傳大仔林孝賢與胡美貽同居 謝玲玲認開明尊重仔女決定

謝玲玲、Aka趙慧珊、李靄璣呢日齊齊現身一個慈善畫展開幕活動，玲玲姐嘅仔女林孝賢、林恬兒、林孝能及林心兒亦有到場，不過大仔林孝賢好快就已經離開未有接受訪問。

對於大仔被傳與胡美貽拍拖兼同居一事，玲玲姐就話自己唔會多事，自己係一個開明媽媽，尊重仔女一齊決定。喺今次慈善畫展捐出9幅畫作嘅玲玲姐，就話希望用自己嘅畫作嚟幫助更多女性，宣傳女性自愛，而今次其中一幅名為《繁花似錦》嘅畫作，就係寓意女性嘅生命都應該活得多彩多姿。

畫作賣得好成績嘅仲有Aka，而家醉心藝術事業嘅佢，表示自己捐出咗十幅畫作，有啲喺未開幕前已經賣出，對佢今次籌款打咗好大支強心針呀。講到未來工作，佢就話會與唔同品牌合作，同時又會開更多唔同展覽。

都市人好多都會忽略自己嘅健康，而Aka就話自己會每半年就會做一次女性嘅健康檢查，佢指好多女性都會忽略呢點，好似佢妹妹上個月先做完一個關於子宮嘅手術，所以佢呼籲大家要關注自己身體健康。