兩歲子患罕見天使綜合症 鄭俊弘何雁詩辦音樂會盼大眾關注

鄭俊弘 同 何雁詩 近日公開2歲嘅囝囝Asher患有罕見遺傳病「天使綜合症」，佢哋指早喺小朋友約半歲大時開始覺得佢發展略慢，去年底經過基因檢測之後，確認Asher得到呢個暫時未有藥物可以治療嘅病症。

Fred指囝囝確診後自己心情直墮谷底，心情難以形容，之後佢尋求醫療協助，仲不時自責垂淚。佢又話同太太Step振作之後，接觸病者組織香港天使綜合症基金，同其他病者家屬溝通。佢哋7月更將舉行慈善音樂會，Fred希望加強宣傳，提高外界對呢個罕見病嘅認識同了解。