邱淑貞沈月母女同場靚吸睛 大劉同賭王千金撐場俾足面

一代性感女神 邱淑貞 同 沈嘉偉 嘅大女 沈月 ，一直都有最美星二代稱號，完全遺傳媽咪嘅美貌。近年少有公開露面嘅邱淑貞，呢日就難得同沈月一齊公開現身上海，以老闆娘身份為老公嘅品牌活動撐場，有兩母女咁靚嘅生招牌，即刻為活動生色唔少。

沈月唔止自己現身撐爹地，仲邀請咗兩位閨密到場，一位係大劉劉鑾雄同甘比嘅大女 劉秀樺 ，另一位係賭王何鴻燊嘅細女 何超欣 ，兩位都係非一般人可以請得郁嘅千金，沈月真係幫爸爸嘅活動出足力呀！

另外到場出席活動嘅仲有 宋妍霏 許魏洲 以及 婁竣碩 等等。許魏洲呢日以平頭裝示人，原來同佢拍攝中嘅新劇《我站立的地方是中國》有關，佢喺劇中飾演80年代嘅邊防軍人，角色要橫跨4、50年，所以係一個好大挑戰，佢仲透露啱啱完成新疆部份嘅拍攝，嚟緊就會繼續去到山東取景。