中年好聲音3丨全球招募正式展開 評審唱將分享參賽貼士

《中年好聲音》第三季正式展開全球招募，「中聲1」嘅周吉佩、羅啟豪、吳大強、龍婷、支嚳儀同林鉫徫，以及「中聲2」嘅顏米羔、黃劍文、安雅希、林若盈、甘永傑、王玥、陳蒨葶、梁浩賢同陳俞霏，節目主持車婉婉、四位常駐評審肥媽Maria Cordero、伍仲衡、張佳添以及周國豐都有現身記招。

兩季參賽者都話節目改變咗佢哋嘅人生，所以極力呼籲對唱歌有夢想嘅中年人，勇敢踏出追夢嘅第一步。吉吉話比賽令佢增加咗唔少自信，身邊嘅Venus都好認同話吉吉依家着外套都唔使打底。Venus話呢個賽事為接近38歲嘅中年擁有自己歌曲。米羔嘅貼士就叫大家快啲報名，因為越諗越驚，劍文就叫大家要保持健康，因為賽事非常緊湊。參加《中年好聲音》唔單止改變人生，仲有機會踏上所有歌手夢寐以求嘅紅館演出，陳俞霏話當初參賽係秉承肥媽話會帶唱將上紅館，肥媽都話講得出會做得到，可能嚟緊呢次係三季中聲唱將一齊踏上紅館。

《中聲3》將會到馬來西亞同大灣區進行海選，預計報名人數一定再創新高，一眾評審都分享成功脫穎而出貼士，伍Sir話畀你最好嗰段就要即刻唱同埋千祈唔好有賴音。添Sir就話不論係35歲定75歲，都唔好有包袱，因為喺台上全部都好公平。周國豐就話海選時就要使出最勁功夫，如果唔係連入圍機會都冇。肥媽就叫大家報名，因為參賽只會贏冇輸。婉婉就預計一定吸引到更多唱得之人報名，成個節目水準一定會再提升。