黎諾懿兒子黎峰睿眼被蚊針 眼皮紅腫堅持完成鋼琴演奏表演

黎諾懿同太太李潔瑩嘅大仔「小春雞」黎峰睿精靈活潑，諾懿今日（18號）喺社交平台分享咗小春雞喺演奏廳表演鋼琴演奏嘅片段，原來就發生咗個小故事，就係小春雞臨表演嗰日朝早，被蚊咬到眼皮紅腫，差啲就上唔到台演出。
諾懿今日分享小春雞喺演奏廳表演鋼琴演奏嘅片段。

見到小春雞喺台上淡定演奏，完成後仲向觀眾鞠躬答謝，再同指揮及樂手握手先返後台，甚有大將之風，但諾懿就喺帖文話發現仔仔峰峰隨着年紀成長，開始懂得緊張。
睇片見到小春雞演出咁穩定，唔好以為佢已經累積咗好多演出經驗，其實佢係喺去年8月先第一次公開演奏。
黎諾懿與李潔瑩育有兩子「小春雞」黎峰睿（峰峰）同「小冬牛」黎奕辰（Luca）。黎諾懿與太太李潔瑩大仔黎峰睿喜愛彈琴。