何展睿揭媽媽一度放棄治療試過拔鼻喉 幸病情漸見好轉

何展睿（Steve）日前去一間小學舉行巡唱，為啱啱考完試嘅小朋友送上歌聲，更同小朋友分享點樣用冷靜同正面嘅態度面對逆境同困難。

Steve媽媽喺年初突然喺家中暈倒送院急救，直到而家仍然喺醫院留醫， Steve話媽媽曾一度想放棄治療，亦試過拔鼻喉，令佢相當擔憂，好彩而家已漸見好轉，媽媽心情亦變好，而自己喺歌唱事業上亦獲得認同，好似早前佢就獲頒優秀唱作歌手獎，收到呢份鼓勵，Steve要特別感激媽媽同太太支持，事關佢話媽媽曾經好擔憂佢嘅歌唱事業，佢而家獲獎都好希望同媽媽一齊分享呢份喜悅。