惠利避談與柳俊烈韓韶禧感情瓜葛 偕Karina共同參演推理新綜藝

韓國女星 惠利 同舊愛柳俊烈以及韓韶禧嘅三角感情風波搞到滿城風雨，事件發生後，惠利一直未有公開露面，近日佢終於蒲頭，現身發佈會宣傳有份參與嘅全新綜藝節目，記者當然唔會放過呢個追問嘅機會，不過惠利就直接落閘，封口不提感情事。

不過講到新節目，惠利就滔滔不絕，佢今次聯同李恩智、John Park、aespa嘅Karina等一齊出演推理遊戲節目，本身好鍾意玩密室逃脫嘅惠利，一收到邀請，諗都唔諗就即刻應承，事關可以寓工作於娛樂，真係諗起都開心。

Karina同樣都受感情事困擾，今年二月佢高調認愛演員李宰旭，但外界對二人戀情就有唔同聲音，Karina仲一度人氣下跌，不過呢段戀情只維持短短五個星期就宣告破裂，回復單身嘅Karina全心投入工作，今次係佢第一次成為綜藝節目嘅固定成員，佢就話希望大家可以通過節目，認識佢唔同於舞台表現嘅另一面。