韓國長腿男神路雲狂派心心氹粉絲 賈靜雯勤做熱瑜伽keep完美體態

韓國長腿男神 路雲 近日現身台灣出席精品時尚活動，吸引大批粉絲前來支持，現場尖叫聲不斷，身高有成191cm嘅路雲，一身all black皮褸襯皮褲，更加凸顯佢嘅長腿優勢，而男神亦好識做，唔止用國語同大家打招呼，仲不斷派心心，氹得現場粉絲非常開心，曾經喺台灣舉行粉絲見面會嘅路雲話，好開心可以再次到訪寶島，可惜今次行程緊湊，冇時間周圍行下嘆下美食，希望下次可以有長啲嘅時間做自己鍾意嘅事。

同場一齊出席活動嘅仲有賈靜雯同金鐘視帝薛仕凌，靜雯著住黑色貼身長裙現身，騷出fit爆身型，佢透露為咗出席呢日嘅活動，已經連續三日做熱瑜伽，即將踏入五字頭嘅靜雯話，既然唔能夠同歲月抵抗，自己唯有努力運動希望keep住最佳狀態。