StarTalk一氣呵成版｜裕美自資出歌再戰樂壇 拒林作參與毁壞心血

裕美 (和田裕美)作客《StarTalk》接受 許文軒 專訪，相隔13年，裕美終於復出樂壇，推出新歌《最佳女友的自我修養》，裕美話人到中年，所以想把握時間做一啲自己想做嘅事，唔好比自己留下遺憾，所以佢話無論結果係點，過程先係佢最享受嘅事。呢次裕美自資六位數字出歌，佢話無要求林作資助，因為佢話林作係一個問佢借錢買杯咖啡，佢都會問你追數嘅人，再加上如果佢有份出錢，佢就會參與好多意見，裕美話為免被佢毁壞自己嘅心血，所以佢都堅持自己出錢出力。

呢次裕美揾黎Patrick Yip擔任作曲及監製，而林雨辰就擔任填詞，裕美話呢次可以參與意見，分享造歌方向，係一件好開心嘅事，事關佢話自己以往出歌都比較被動，講番過往嘅作品《雪映移城》《搭錯車(Yamete!)》，佢話有一段日子，都唔敢睇番同聽番，但而家人大咗，心態亦有變，所以佢會同自己講，「過去無論好與壞，都係成就今日嘅自己」。