詹天文開騷在即加緊備戰 完成中央音樂學院面試盼7月中公佈升讀大學定案

詹天文（Windy）呢日出席一個宣揚賭博禍害嘅活動擔任揭幕嘉賓，為活動獻唱《沒有你的新學期》及《大雕刻家》炒熱氣氛，Windy完成咗DSE考試，參與畢業劇演出，佢好享受不停工作，坦言冇時間去玩。

Windy早前出席謝師宴，指好唔捨得啲老師及同學，畢業禮當日喺台上一路唱歌一路喊，於謝師宴散席時，佢心情百感交集，覺得可能係最後一次見呢啲同學，以後再約亦未必齊人，希望大家一齊走向更美好嘅前程。

Windy嚟緊7月19號至20號將與姚焯菲(Chantel) 及鍾柔美(Yumi)舉行《音樂出沒 Let’s play together》演唱會，Windy開騷在即，不停操fit自己，又要加緊備戰，Windy透露Chantel要7月6號左右先返嚟，希望大家趕到時間排好啲歌舞，呈現最好一面畀觀眾，Windy想畀到大家一個驚喜。

Windy忙於準備開騷，又將推出第三首單曲，日前喺烈日當空下拍完MV，Windy坦言非常辛苦；Windy早前面試完中央音樂學院，香港嘅學校亦已面試咗，佢要等7月中出咗結果先同大家公佈，暫時尚未有升讀大學定案。