郭富城不惜工本拍演唱會主題MV 忘我演出盡顯舞蹈爆發力

郭富城世界巡迴演唱會香港站反應熱烈，Aaron 同製作團隊亦全力投入籌劃及綵排，主題歌《EXIT》MV 派台後，反應亦都非常好。今次嘅歌曲組合、排舞老師、MV導演雖然係首次合作，但已經擦出非常亮麗嘅火花。除咗Edward Chan 用心監制之外，排舞方面亦請嚟跳舞天團嘅Mike Song 同Anthony Lee負責今次編舞，凝造出一種好有力量嘅舞蹈風格，佢嘅節奏感可謂別樹一格，帶出一種充滿格調嘅時尚節奏。

隨住兩位舞蹈名師日前來港為Aaron演唱會排舞，大會特意將拍攝MV嘅花絮同大家分享。今次MV拍攝可謂不惜工本，製作費接近一百萬。導演組希望帶出《EXIT》多角度嘅跳舞場景，特別租用兩個偌大的影棚搭建不同嘅場景，包括比Aaron 一人獨舞嘅木板地舞室，營造一種放飛自我嘅空間，仲有三個同舞群互動跳舞嘅空間。今次動員20名精英舞者、分飾不同角色，配以獨特造型，演繹舞者初心。導演特別喺影棚搭建一個夢幻感嘅燈陣場景，以表達舞者一齊互動跳舞嘅開心自由世界，場景轉換間亦盡見舞蹈嘅爆發力，視覺聽覺都係一大享受。

此外，仲有一個光影隧道，帶出熱愛跳舞嘅舞者一種沉迷氣氛，同時亦標誌住舞曲嘅新出口，好有意境。

年青新銳導演Lam Dee首次同Aaron 合作，非常用心，他表示：「Aaron真係一位好有魅力嘅巨星，將熱愛跳舞嘅感染力，超乎想像地發揮！」整個拍攝接近20小時，而Aaron都拍足16個鐘，喺唔同角度亦盡力跳到最好。現場嘅Dancers亦全情投入為Aaron伴舞，而排舞師Mike表示：「Aaron嘅舞蹈功力，真係不一樣嘅境界，令我非常佩服。」

Aaron亦表示：「我一直希望尋求突破，電影係、舞蹈都係，今次同Mike及Anthony 合作，我又更掌握到咩係跳舞嘅初心，就係不斷嘗試、堅持、求變同熱愛。」兩位老師同時亦為Aaron演唱會嘅其他章節作編舞，大家已經全情投入排練中，Aaron希望全力以赴，為觀眾呈現出突破舞台視野，既震撼又帶魅力嘅演唱會。