鍾志光獲教大頒榮譽院士銜 圈中好友齊集到賀

喺《愛．回家之開心速遞》演老闆Kai叔嘅鍾志光，喺6月28號獲香港教育大學頒授榮譽院士銜，以表揚佢對體育界、教育界，以及社會嘅貢獻，有萬能鍾之稱嘅鍾Sir，入行超過30年，佢除咗係演員、主持、資深足球評述員之外，原來佢仲滿肚墨水，曾經執教中文同體育科，憑佢專業嘅工作態度，深受各界尊重同認同，鍾Sir獲獎固然開心，而家得到高等教育界肯定，的確係一種光榮。

鍾Sir話當初收到通知係唔敢相信，因為從來冇諗過得到咁大榮譽，但係當刻要保密消息，鍾Sir話連太太都唔敢講，只係追問太太6月28號喺咪香港。咁重要日子，除咗太太支持，仲有一班圈中老友如胡楓、盧宛茵、許思敏、黎彼得同陳榮峻夫婦等嚟到見證盛事，修哥話鍾Sir不斷學習，今日有咁嘅成就，係努力所得，亦係後生一輩典範。