李沐為求真實被吳慷仁真打 大鶴拍攝時被狗圍嚇到喊

金馬影帝吳慷仁、李沐、葉全真、林鶴軒同埋周予天，呢日出席新作喺台北電影節嘅首映。慷仁同李沐初次合作，喺戲中上演大叔跟女學生嘅愛情故事，現實中佢哋年齡相差14歲，但合作起嚟一啲代溝都冇，亦唔需要太多時間磨合，李沐話喺前輩身上學咗好多演技，同埋保護自己嘅方法。

初初佢哋都係借位打，但有啲角度導演覺得會令觀眾覺得偷懶，同感覺係因為李沐怕痛，經過協調後，有一兩個鏡頭就用真打。李沐借機會讚慷仁好出色，用力同收力都做得好好。慷仁都話能夠同年輕演員合作好開心，從中汲收到活力。

演叛逆富家女嘅李沐，喺戲中對更生人士嘅慷仁一見鍾情，繼而展開又愛又恨戀情，李沐都話自己係一見鍾情派，反而慷仁覺得一見鍾情太唔寫實。講到難忘嘅戲份，大鶴就話有次喺田度拍攝，突然被六隻唐狗包圍，嚇到佢喊咗出嚟，佢話咁驚嘅原因係曾經被狗咬，當時仲去咗醫院睇急症，住院三日得知患上敗血症，當時醫生仲同佢妹妹講唔可以出院，因為情況危急。