周董公開呼籲大巨蛋批期成首開騷藝人 金智媛甜爆訪台盼嘗珍珠奶茶風味

久未於台灣出席活動嘅 周杰倫 呢日同熱爆韓劇《淚之女王》嘅女星 金智媛 一齊現身名牌新店開幕，吸引大批傳媒同途人逼爆現場。身為品牌全球代言人嘅周董，呢日亦趁機公開向台北最近已經開始營運嘅大巨蛋球場公開呼籲，希望盡快回覆申請成為首個開騷藝人嘅進展，仲話自己8月檔期已經預備好咁話。

而當地管理機構之後亦回應指，當場地通過各項檢測同安排妥當，就會盡快開放場地呀。

呢日除咗周董之外，金智媛現身時亦大受歡迎，佢對大家嘅熱情仲非常驚訝同感激，仲話非常期待一試珍珠奶茶同芒果冰嘅滋味呀。同場現身嘅 劉以豪 亦都話非常期待同心中女神見面，仲打算用韓文歡迎對方同自我介紹，仲非常希望有機會可以同對方合作。

至於台灣美女 王淨 同 陳庭妮 亦都有參與開幕活動，王淨仲指自己買袋唔會預設Quota咁話喎。而陳庭妮就爆出老公胡宇威不時都會送上小禮物氹自己問心，非常甜蜜呀。