小S為動力火車拍MV爆發演技 自言已對情慾戲駕輕就熟

台灣組合動力火車推出新歌《催眠》並邀請小S徐熙娣擔任MV女主角，小S呢次喺MV演技大爆發，飾演一位瘋狂精神病患嘅佢更同日籍演員有大膽情慾戲份。出席MV首映會，欣賞成品後嘅小S對自己嘅表現相當滿意，更即場喊話，歡迎劇組搵佢飾演唔同角色，就算係一個阿婆，佢都願意飾演。不過當動力火車聽到小S話，自己已經對情慾戲駕輕就熟時，佢地就鬼馬反問小S：「有在家演練一下嗎？」小S就答：「老公是固定的，跟其他男演員就是會有比較不同的火花。」場面搞笑。
 
為咗答謝小S演出MV，動力火車都特別準備咗一台吸塵機做禮物，大玩食字，寓意：「我們愛吸地（國語諧音：熙娣）」，
 
小S自認係動力火車歌迷，更笑言呢個亦係自己答應演出嘅原因。為表真誠，小S更即場獻唱《忠孝東路走九遍》、《當》，但唱得太用力搞到走音，仲引到動力火車都忍唔住開聲一齊唱。被問到未來會唔會有機會喺演唱會合作，動力火車就當然願意，不過小S就話自己只唱小巨蛋，如果係大巨蛋，自己會覺得怕怕。