碧咸夫婦慶銀婚週年紀念 著返25年前紫色禮服fit到爆

萬人迷足球金童碧咸(David Beckham)同老婆維多利亞(Victoria Beckham)，啱啱度過結婚25週年紀念日，成日透過社交媒體放閃嘅兩公婆，喺呢個銀婚嘅大日子，當然唔會放過同大家分享喜悅喇！

碧咸兩公婆著返1999年嘅紫色禮服。

碧咸同碧咸嫂分別喺IG po出一輯佢地兩公婆身穿紫色禮服嘅相，原來呢個正正係佢地1999年結婚時著住嘅其中一套禮服，碧咸仲好盞鬼咁寫道：「Look what we found…(睇下我地搵到啲乜)」。相隔25年，二人竟然仲塞得入套衫，而且毫無難度，證明兩公婆咁多年身型都keep得咁好，尤其碧咸嫂生咗三個仔一個女，身材竟然零走樣，認真犀利呀！
Victoria Beckham
碧咸1999年同維多利亞奉子成婚，由於二人當年一個係足球界萬人迷，一個係紅遍全球嘅Spice Girls成員，一舉一動都係媒體嘅焦點，即管呢段婚姻初時不被睇好，亦都經歷唔少暗湧，甚至碧咸喺自傳記錄片仲親口承認有過一段婚外情，維多利亞亦話因此經歷人生最低潮，不過二人最終選擇繼續攜手前行，如今迎來結婚25週年，一家六口幸福美滿，令人羨慕。
David Beckham