歐倩怡稱5年前重病瀕死 郭晉安專心拍劇拒作回應

郭晉安、郭柏姸、陳曉華、何依婷、羅子溢同何廣沛等一眾演員，今日為新劇《金式森林》拍攝一場舞會嘅戲份，大家都盛裝上陣。近排天氣酷氣，一班演員都要喺高溫之下拍外景，令安仔都覺得係好大挑戰。嚟緊暑假，佢話唔使刻意幫仔女安排活動，但之後就會陪仔仔到英國開學，佢都直認會有唔捨得感覺，佢又話近排同仔仔嘅關係有好微妙改變，發覺仔仔聽話咗，可能仔仔感覺到就快同爸爸分開。

安仔話之前同歐倩怡宣布結束18年婚姻，但Cindy近日向傳媒透露喺2019年時身體不適未獲人及時照顧，安仔被問及此時事就表示不再回應不是事實的事，呢個亦係佢一向面對傳媒嘅睇法。講到會否擔心小朋友睇到相關報道而影響心情，安仔指即使仔女無睇，身邊同學都會跟佢哋講，所以自己都有同仔女輔導傾偈。

對於前妻玩交友app，安仔就表示唔清楚，始終大家分開咗，所以唔會再作出評論。當被問到會否一齊出席仔女嘅活動時？安仔指夾到時間就會，而兩人保持朋友關係，有時都會短訊傾談仔女嘅事。