王子七位數投資細佬毛弟副業 與鄧麗欣分手三年感情各自精彩

王子邱勝翊同毛弟邱宇辰兩兄弟，由選秀節目出道18年，喺娛樂圈各自努力，都有唔錯嘅成績。毛弟過去多以主持為主，今年大膽轉型接拍BL劇，演技終於得到肯定。事業發展順利嘅毛弟，近日更推出個人品牌，而背後大金主就係阿哥王子啦！正所謂兄弟同心，其利斷金，毛弟話其實三年前已經想成立個人品牌，直到今年終於落實，「這次的投資金額超過七位數，謝謝我老哥，他是幕後金主。」
王子成為毛弟個人品牌嘅幕後金主。
王子唔單止出錢，仲出埋力，同細佬一齊做生招牌影相，連毛弟嘅囡囡「Momo醬」都粉墨登場，毛弟大讚囡囡好有明星潛質，「有個鏡頭要她跟我一起轉頭，我沒有叫她的名字，但她完全跟我同步轉頭看鏡頭，全場都驚呆！」
Momo醬嘅自拍好可愛！
事實上王子已經有10年經營個人品牌嘅經驗，當年佢同鄧麗欣熱戀時期，Stephy都曾經著王子品牌嘅服裝為男友宣傳，近期Stephy傳出新戀情，戀上6呎型男翻版阿Rain，而王子亦同台灣女藝人席惟倫傳出緋聞，二人分手三年後喺感情路上各自精彩。

鄧麗欣亦傳出戀上6呎型男翻版阿Rain。