《新聞女王》班底聲演《森林女王》 何廣沛投訴雌性動物俾馬貫東媾晒

由《新聞女王》班底聲演嘅野生動物劇集式紀錄片《森林女王》即將由7月15日起接檔《繁花》，於夜晚九點半黃金時段於翡翠台播出。王敏奕Venus、郭柏姸Rosita、何廣沛Matthew、龔慈恩、馬貫東、鄧智堅等一眾有份參與聲演嘅演員齊齊現身宣傳活動。紀錄片講述喺非洲大草原上各動物族群弱肉強食嘅殘酷鬥爭，阿東聲演狒狒首領，佢話自己嘅角色好花弗，要將所有雌性狒狒收歸己有，同樣聲演狒狒嘅Matthew就搞笑話，唔怪得自己要做單親爸爸，因為連前妻都被阿東搶埋添。

Venus同Rosita兩位靚女睇上去嬌滴滴，原來佢地都可以好wild，仲異口同聲話好期待有機會可以親眼見識非洲動物大遷徙。

阿堅喺熱播劇《反黑英雄》飾演道友入木三分，啱啱播出嘅一集仲展現高難度演技，有12種情緒變化，令觀眾睇得好投入，阿堅就話好多謝觀眾嘅支持，亦好感恩監製同導演俾機會佢嘗試唔同角色。

《森林女王》由7月15日起 21:30 翡翠台