《城寨》成富川影展閉幕電影 信一劉俊謙韓媒專訪分享拍攝苦樂

《九龍城寨之圍城》成為今屆「富川電影節」閉幕電影，有份參演嘅 劉俊謙 更成為當地傳媒嘅焦點演員之一。原來大家自佢年前參與《梅艷芳》一片扮演「張國榮」時，已開始留意呢位新晉演員；加上唔少當地觀眾都係張國榮忠實Fans，所以當得知阿謙扮演哥哥時已對佢份外好奇同關注。

劉俊謙近年成為香港甚至華語影壇新星

早已衝出香港拍攝唔少台灣影視作品嘅阿謙，因身處香港拍攝新片，所以未能出席今次富川電影節嘅閉幕電影放映，不過早前佢接受當地傳媒訪問，分享參與電影演出嘅過程，仲坦言希望有機會同韓國演員、導演合作交流。佢話：「如果有機會，我想嘗試參與韓國電影或電視劇演出，我本身好喜歡李滄東導演，佢嘅電影《綠洲》係我最欣賞作品之一，而宋康昊就係我喜歡嘅演員。」

提到早前同一眾電影拍檔參加康城影展，踏上紅地毯嘅感受，阿謙就話對而家仍難以置信：「當日行上紅地毯我個腦其實係一片空白，太夢幻喇。呢個經驗會成為我永遠難忘嘅記憶，亦令我更加決心將來要成為一名偉大演員。」

近日因為《城寨》接受韓媒專訪嘅佢，提及於康城踏上紅地毯嘅心情

至於有份演出正邁向票房最高紀錄嘅《九龍城寨之圍城》感受，阿謙就坦言係艱辛嘅經歷：「有一個場景，我要喺狹窄嘅橫巷揸電單車，因為電單車好重，好難保持平衡，排氣管仲燙傷小腿。」 

一眾台前幕後拍攝時都出盡精力務求盡善盡美

佢亦提到戲中連場動作戲亦係艱鉅挑戰：「大概20日嘅拍攝，我們每日大約拍16到17個小時，有試過24小時不停拍。拍到有啲神志不清，正因為每個崗位都共同努力，先創造出呢番成績，我真心尊重導演同其他演員。」

年前佢演出《梅艷芳》時已受到韓媒注視

而早年喺《梅艷芳》被選中扮演張國榮時，阿謙亦指壓力極大：「呢個係我不能錯過嘅機會。我唔敢相信正在扮演張國榮！佢係我欣賞嘅香港演員之一，我父母亦係哥哥嘅超級Fans，每日都聽佢嘅歌。被選角後我重新狂聽佢嘅歌曲，又翻睇佢嘅電影作品。我最鍾意嘅係《霸王別姬》。」