梁靜茹北京開騷約定歌迷一生一世 大唱催淚情歌 歌迷安慰變搞笑

情歌天后 梁靜茹 上周末13同14號喺北京舉行一連兩場演唱會，寓意同2.4萬歌迷相約「一生一世（1314）」，就連梁媽媽都坐喺台下低調觀賞。靜茹喺台上對媽咪講：「在追逐夢想的路上，我總是會自我懷疑，我真的還要繼續往前衝嗎？還是我要停下來往回走。選擇唱歌這條路。」仲話因為有父母支持，就算離鄉別井覺得孤單，都會繼續堅持。

梁靜茹日前於北京再舉行兩場演唱會

相隔11個月，靜茹嘅巡唱重返北京演出，佢誠意十足換咗2套全新造型，連場多首慘情歌，期間靜茹難掩激動：「唱這些心痛的歌，我喜歡讓自己沉醉在這個夜裡，那種跟故事很接近的感受…淚水需要在夜裡獨自把它唱出來，」靜茹講講下現場突然有粉絲大叫：「不准哭！」氣氛即時變得搞笑。

Fish演出時情緒感觸，不過就被台下歌迷一句逗笑

之後靜茹繼續演唱《分手快樂》、《崇拜》、《燕尾蝶》等大熱歌曲，而喺encore點歌環節，佢首次喺北京獻唱《屬於》，越唱越開心仲要求樂隊老師：「我們要不要升Key再來一次？」最後佢喺台上感性訴心聲：「我曾經在演唱會上不曉得要說什麼，升降台升上來，我就哭出來，很想要逃走；既想要挑戰又恐懼，一次又一次，但我想在你們心目中，我應該有一點一點的進步。」最後靜茹演唱萬眾期待嘅《勇氣》，為演唱會畫上句號。

今次演出Fish嘅歌單同服裝都經過改動，演出日期仲食字要同歌迷「一生一世」