郭富城型爆亮相宣傳年尾小巨蛋演唱會 預告全家總動員聖誕赴台睇騷

天王郭富城換上all back新髮型，以型爆造型呢日出席台北記招，宣傳年尾舉行嘅台北小巨蛋演唱會，大批粉絲到場支持，城城相隔5年再喺台灣開騷，佢為咗當地歌迷調整歌單，預告獻唱多首金曲，同觀眾朋友嚟一個回憶殺！

Aaron近日到台灣宣傳年底於台北舉行嘅演唱會
城城喺機場見到一啲由1990年開始一直跟隨自己嘅歌迷，佢哋已經長大，城城見到歌迷感覺似見到家人咁；城城之前喺紅館開演唱會搵到張叔平設計造型，一系列假髮look畀咗大家唔少衝擊，城城透露今次將以新造型喺台北演唱會亮相，希望大家見到佢更有型嘅一面。
佢仲話今日會全家動員，到台北一齊過聖誕咁話

城城又指呢次喺台北開騷，將全家總動員前嚟支持，皆因5年前開騷時，細女二寶年紀比較細，當時未有隨行，而家細女已經5歲，可以陪家姐、媽媽同公公婆婆一齊赴台，嗰陣亦正值係聖誕假期，城城大讚阿女好厲害，可以把香港演唱會run down背出嚟。