黃子華指到殯儀館取景零壓力許冠文稱有責任為香港做啲嘢

對於黃子華與許冠文於電影《破・地獄》上合體，令唔少觀眾引頸而待，有見及此，電影公司宣佈將於9月28日，於YouTube播出二人嘅世紀對談。

黃子華與許冠文對話。
日前電影公司釋出二人對談嘅分半鐘預告片，當中Michael尊稱子華為「子華哥」，搞到一直視Michael為偶像嘅子華，只好以一個尷尬而不失禮貌嘅微笑嚟回應。Michael其後解釋稱對方為子華哥嘅原因：「我對你有一種特別嘅尊重，香港居然有人敢用廣東話做棟篤笑！」

Michael叫黃子華做子華哥。
兩人於對談中由相識講到電影嘅合作，子華亦大膽問Michael當年電影電視成績斐然，算唔算係「少年得志」？對此Michael表示：「賺到錢先係少年得志，我嗰個時候都賺唔到錢。」此外，子華亦自爆當年某部佢主演嘅電影，當年喺佢唔知情嘅情況下，搵嚟Michael客串，對此子華話到而家自己都好在意。
Michael解釋咩叫「少年得志」。
對於相隔32年再度合作電影，子華指喺香港冇見過有電影有膽面對呢個題材，同時佢亦覺得：「對喜劇要求好高嘅人，可能好適合拍悲劇。」而Michael則表示覺得自己有責任同子華一齊為香港做啲嘢！
子華話因為自己係喺TVB訓練出嚟，所以對喺殯儀館取景零難度。
電影有唔少場口都係喺殯儀館實地取景，當大家諗緊主演們會唔會驚時，子華就坦言：「因為我喺TVB訓練出嚟，我覺得幾舒服吖喺萬國殯儀館外面。」而喺預告完結前，子華向Michael留下一句：「你仲有女朋友嘅咩？」然後二人即笑不攏嘴，令對談留下懸念。