吳香倫分享皮肌炎患病經歷感謝老公照顧 陳榮峻過來人身分鼓勵照顧者給予支持

陳榮峻飾演《愛‧回家之開心速遞》譚道德校長同吳香倫飾演嘅太太譚何容儀係一對恩愛夫妻，而現實生活中陳榮峻同吳香倫亦係一對真夫妻，不過陳榮峻喺劇裡係大男人，戲外就係一個體貼好老公，2018年太太吳香倫確診皮肌炎後，貼心照顧另一半。

陳榮峻喺劇裡係大男人，戲外就係一個體貼好老公。
2018年二人結婚前夕，吳香倫因為久咳不癒就醫，確診患上皮肌炎二期，並且併發間質性肺病，確實時肺部已經纖維化，要喺手指同大腿開刀取出肌肉組織化驗，化驗結果顯示肌肉酵素高過正常人高達10倍，喺醫生建議下立即入院接受治療，吳香倫回憶確診一刻，依然歷歷在目：「當時我哋兩個都呆咗，非常擔心，而家講起我都仲震緊。」

吳香倫與病魔搏鬥多時，透露因為定時複診食藥，現實狀況已經好好多。
講起病情對生活影響，吳香倫坦言最主要係咳：「好多時候我要唱歌拍戲，有時我用力或者吸氣就會咳，影響我生活好多。」陳榮峻見太太辛苦卻又愛莫能助：「佢行100米路可能要5分鐘，好容易攰，最影響佢生活係手指關節只要稍微彎曲就會痛。」

吳香倫透露自己嚴重到去飲茶都拎唔起茶壺，皮膚情況更係化妝都遮唔到，因為會生癬生到好似皮膚病咁。
吳香倫透露自己嚴重到去飲茶都拎唔起茶壺，皮膚情況更係化妝都遮唔到，因為會生癬生到好似皮膚病咁，好彩佢有個體貼嘅好老公，「多謝老公幫手拎重野，上下車會扶吓我，辛苦你。」陳榮峻聞言即話唔辛苦，照顧老婆係老公嘅責任。

陳榮峻仲以過來人身分畀其他照顧者建議，多給予病人支持。
陳榮峻仲以過來人身分畀其他照顧者建議：「作為家屬一定要畀病人支持，無論生理上或者心理上，尤其需要長期食藥，脾氣各方便都唔係太好，作為一個丈夫嘅責任，佢心情唔好嘅時候就開解佢。」陳榮峻講笑話自己係人肉鬧鐘，要冒住被人鬧嘅風險，定時定候提醒太太食藥。最後佢仲提醒照顧者，首先要放開自己，先可以照顧對方，唔好畀病人覺得自己係負累。吳香倫與病魔搏鬥多時，透露因為定時複診食藥，現實狀況已經好好多，相信有個咁體貼嘅好老公貼身照顧，一定會好快康復！