新城被傳有意裁員十多人 馬浚偉開腔：並冇裁員，唔好亂作

馬浚偉 今年初加入新城電台擔任首席營運總監，銳意展拳腳嘅佢當時既成立音統會重整頒獎制度，又邀請 陳小芝 回巢擔任總經理發展數碼媒，而啤梨則升任創作總監，又負責新開發嘅網上平台「MBO TV」。

馬浚偉今年由港台跳到新城擔任高層職務
雖然埋位未夠一年，有指馬仔入主後成績不俗，當時佢亦指未有裁員計畫，不過近日就有網上消息指，新城有員工求助，指稱年內難以達到馬總監嘅5000萬營業額要求，亦對年內電台舉行嘅音樂會安排，仲有網上平台嘅營運有唔同睇法，仲話臨近年尾，馬仔因需「做靚盤數」而有意削減開支，仲有傳將向十多位員工派大信封將佢哋辭退云云。
不過近日就網傳有指KPI未達標而有意裁員執靚盤數

新城公關事後回應傳媒指，「並非事實，不作回應」，而身為事件主角嘅 馬浚偉 ，星期六就Post出同幾位電台高層，包括總經理(節目規劃及頻道運作）朱子昭、總知訊台台長 程凱欣 、總經理(項目及商業事務)朱靜宜、股評人 胡孟青 同 財經台台長 魏美珍 嘅合照。
馬仔入主新城後動作多多，亦經社交平台回應今次裁員傳聞

同高層去完蘭桂坊就出Post指冇裁員

馬仔喺呢個高層Post仲話：「我真係唔記得我幾多年冇真係去蘭桂坊坐低飲嘢（當然我依然係冇飲酒嘅），今晚同成班同事睇完show去飲嘢，又真係好開心，仲要12:30先至離開返屋企，真係破天荒！」幾大高層坐低飲嘢，傾咩馬仔就冇講，不過個Post就有最緊要嘅一句喇：我哋「新城廣播」並冇裁員，唔好亂作啦

兩位總經理兩位台長加埋青姐，傾美股定係講減息呢？