張敬軒網上為長輩集氣 盼對方能順利打勝仗

啱啱完成咗澳門演唱會嘅張敬軒，噚日喺社交平台呼籲大家為佢嘅一位長輩集氣，原來軒公一位長輩入咗醫院，佢喺帖文中表示：「我有一位好親愛好親愛嘅長輩好需要集氣祝福, 佢對我恩重如山, 如果您行過路過, 可唔可以留低我一個紅色心心喺度, 我願意用我嘅幸運以及我所得到嘅愛, 去換佢呢一關要打勝仗🙏🏻🙇🏻‍♂️ 衷心多謝大家！ ❤️」

軒公出post為長輩集氣。

帖文一出，喺16個鐘內就已經有4.1萬人like咗呢個post，當中有唔少人都喺留言區留咗一個 ❤️為軒公同佢嘅長輩集氣加油，而喺帖文post出後兩個鐘，軒公再次留言感謝大家：「真係好感動, 好多謝大家！願呢一份嘅能量相互轉換, 各位獻出嚟嘅愛會返回到各位嘅生活當中, 平安、喜樂、幸福常與各位同在❤️」。希望軒公同佢呢位長輩都平安，同時亦可以打勝仗啦！
軒公嘅集氣文獲4.1萬人like。張敬軒為長輩集氣，盼對方可以打勝仗。