車婉婉排除萬難帶囝囝參加比賽 BBQ獲朗誦第一喜出望外

車婉婉嘅囝囝BBQ，話咁快已經係一個小二生，日前BBQ就參加咗學校朗誦節，仲攞到第一名添，認真叻仔呀。

婉婉嘅乖囝BBQ日前喺朗誦節得到第一名
不過婉婉就指囝囝比賽當日，咁啱係學校考試，由於時間上好緊迫，本來婉婉怕趕唔切，有諗過放棄比賽，但係因為BBQ為咗呢個比賽練習咗好耐，所以最後都係決定盡力搏一搏。
原本因為時間緊迫而打算放棄比賽嘅婉婉，事後就有唔少領悟

婉婉喺佢既社交平台好生動咁將成個趕去比賽嘅驚險過程寫出嚟，佢話：「BBQ先生放低支筆即刻由灣仔出發去觀塘「朗誦節」會場，時間真係啱啱好咋，QMaMa真係成額汗，好彩，安全準時到達，順利演出，仲得到第一名，真係喜出望外﹗」
盡量把握每一滴親子時間嘅婉婉，希望藉呢件事請大家唔好輕言放棄

佢話分享呢個故事，係想話比大家聽，原來父母嘅決定，對子女可以有好大分別，選擇放棄其實係最快、最容易，咩都唔駛搞，正﹗瞓多陣﹗反之要堅持，的確係有好多好多問題，所謂「麻煩」要安排、要解決，終於QMaMa選擇「麻煩」，婉婉又話今次經驗教導佢，唔好因為自己怕麻煩，而令小朋友失去可能係一次好寶貴嘅經驗。

婉婉一家三口非常融洽又恩愛