葉童黃德斌主演舞台劇圓滿完成 寶珠姐尾場打氣天王贊助學生入場

葉童 黃德斌 同 楊永德領銜主演嘅黑色喜劇《唔講得》，5場喺文化中心嘅公演圓滿完成，舞台經驗豐富嘅 陳寶珠 亦有欣賞尾場演出，仲同大家合照留念。之後導演同負責改編劇本嘅 胡恩威、監製 陳善之 幾位主演仲有音樂表演者 李俊樂 齊齊出席慶功宴，胡恩威仲為主演們訂製印有《唔講得》海報嘅黑膠唱片包裝作紀念。

陳寶珠趁尾場欣賞黃德斌同葉童等主演嘅舞台劇
身為女主角嘅 葉童 表示，演出前從未預計過觀眾有咁好反應，部份Fans仲先欣賞普通話版「做定功課」，加上演出對手新鮮，激發佢對詮釋角色嘅投入同熱情。佢亦提到今次飾演角色同情緒起伏極大，加上要牢記大量對白，不過令觀眾產生共鳴，就消除唔少疲憊，更加話今次表演圓滿，冇任何遺憾呀。

胡恩威為大家訂製專屬黑膠唱片包裝

而 黃德斌 今次已非首次參演舞台劇，不過就一直擔心演唔好角色，仲因為對白多等問題而感到緊張，而經過一段長時間排練後，佢亦對呈現角色增加信心，更有唔少觀眾認為佢表現有別過往影視作品中演出，令佢非常欣慰。

德斌指演出《唔講得》前心情非常緊張

身兼多個重責嘅 胡恩威 就指今次《唔講得》從籌備到演出花足11個月時間：「最大挑戰係有好多對白，四位演員百忙中安排足夠時間圍讀劇本同排練，所以5場演出可以見到佢哋嘅功力同努力。」

監製陳善之透露有天王朋友贊助下，約300名學生可以入場欣賞舞台劇，仲獲導演親自講解
被胡恩威邀請擔任監製嘅 陳善之 唔止對有份參與非常開心，仲話今次得到一直以來都非常支持藝術推廣同教育嘅天王級好友贊助，令300多位學生有機會觀賞《唔講得》演出，又同導演直接交流。 非常高興可以將本土藝術文化傳承予年青人。