中年好聲音3｜張家豪被批樣衰回應真材實料 陳欣年前擊退癌魔享受舞台

經過一輪激鬥之後，《中年好聲音3》香港賽區、大灣區同新馬賽區共60強選手正式登場，今次賽會安排 「史上最殘酷賽制」，5燈選手將直接晉級，而1燈就會立即被淘汰，至於獲2至4燈選手則要接受台下選手挑戰。若已滿30個名額，就必須獲5燈先可以晉級。

之前因椎間盤受傷，要撐拐杖演出嘅5燈選手吳海楊，因身體問題決定退賽。變成59強以PK賽爭奪30個晉級名額。

今集歌單如下：張與辰《Superwoman》、李金凱《給自己的歌》、尤志豪《初戀》、莫麗淇《明知故犯》、楊炳德《這麼近(那麼遠)》、劉洋 《偷心》、胡家健《親情》、嚴志恒《阿牛》、陳威《普通朋友》、王鄭浚仁《落葉歸根》、張家豪《美麗之最》、梁華勝《沙龍》、陳芷盈《Forever Love》、陳欣《空白格》。

其中顏志恒嘅中學師弟；5燈選手張家豪，同師兄一樣同為西餐廚師，佢直言自己讀書成績麻麻，令父母「冇嘢值得驕傲」，長大後踏入社會工作，亦曾借錢經營酒吧卻生意失敗。最終因欠債而申請破產，再度令父母擔心：「雖然我冇咩成就…希望今次參加《中年 3》可以令到父母覺得自己係得嘅。」
張家豪認為自己真材實料，更希望父母可以自己為傲

張家豪坦言在意別人指佢「唱歌幾好，不過個樣就衰啲」，更認為：「其實唱歌任何人都唱得，唔關外形、相貌事，好食嘅嘢唔一定要賣相好，最緊要真材實料。」
以5燈晉級嘅佢今仗以《美麗之最》出戰

張家豪以《美麗之最》對戰4燈嘅梁華勝《沙龍》，前者被「左右門神」伍仲衡同周國豐指出有黐脷筋問題，張佳添亦狠批其「嘴唇懶惰」：「3分2首歌你都用口腔唱，嘴唇非常懶惰。」而梁華勝因聲線激似陳奕迅、曾獲周國豐建議「可以唱多啲陳奕迅嘅歌」，呢集聽話繼續揀選「神歌」，可是相比之前演出同樣強差人意。
梁華勝雖然聲線似Eason，但就被指嘴唇懶惰

今集起擔任嘉賓評判嘅Alan布志綸仲點評指佢欠缺感情猶如唱K，張佳添聞言拋出一句：「終於明白點解有首歌叫《如果我是陳奕迅》，咁個個唱陳奕迅嘅歌都可以好好聽。」場面搞笑。
Alan更直指佢好似唱K

今集繼續「有故事的人」嘅感人分享，大灣區3燈選手陳欣透露，兩年前曾與惡性腫瘤對抗，樂觀面對病情嘅佢治療時經常「在心中唱歌」鼓勵自己：「開心就是最好的良藥，因為心情好了，所有東西都會好。」

陳欣兩年前曾同癌症對抗，最後重獲新生
陳欣自細被任職音樂老師嘅媽媽薰陶愛上唱歌，如今亦已痊癒，希望喺舞台做鍾意嘅事。而佢挑戰嘅對手係 「中3王菀之」；5燈選手陳芷盈，陳欣獻唱《空白格》對戰陳芷盈嘅《Forever Love》。相比上次獻唱《有了你》大獲好評，陳芷盈今次演出似乎跌Watt，仲被伍仲衡直指：「中間bridge好多accent，你完全食唔到。」

陳芷盈今次演出表現一般
而陳欣對比上回演出沒有太大出入，周國豐指佢雖然唱出味道，但由於歌曲起伏不大，以此歌出戰PK賽，會令佢處於不利狀態，到底邊位選手會晉級下回合，記得密切留意周日晚嘅《中年好聲音3》。

《中年好聲音 3》星期日晚 20:30 翡翠台