梁詠琪為香港歌迷打造專屬歌單 每晚送出親自製作陶瓷杯

梁詠琪Gigi 一連5場嘅Side Track音樂會，27號晚喺演藝劇院正式開鑼，老公同囡囡都有嚟捧場，今次音樂會歌單轉成全廣東話歌，令歌迷相當期待。
梁詠琪一連五場嘅音樂會喺 27號舉行。
Gigi喺台上表示自去年開始Tour後，走訪咗好多地方，亦令佢重遇到好多忠實歌迷，勾起好多回憶：「發現自己好多收藏咗好耐嘅sidecut作品同故事，係時候攤出嚟同大家分享。我希望借呢幾個晚上，同歌迷一齊細味呢一啲回憶。」
Gigi為每晚嘅演出打造專屬歌單。
除咗歌曲帶畀大家嘅回憶外，Gigi每晚都會喺台上分享唔同嘅昔日珍藏，首場佢就拎出19歲初入行時，飛到日本拍攝嘅日本雜誌封面，另外佢仲喺現場播出一段自己20歲同影迷第一次慶祝生日時，錄畀歌迷嘅一段錄音。當聽到卡式錄音帶播出自己稚嫩嘅聲音時，Gigi搞笑咁打咗個冷震話：「嘩！呢個女仔邊個嚟㗎？咁cute嘅？」令全場觀眾哄堂大笑。
新晉演員Henry陳獻略與Gigi同台演出。
今次香港場音樂會前半段歌單以「回憶」為主軸，當中加入戲劇元素，由新晉演員Henry陳獻略除咗於台上演獨腳戲外，又彈結他伴奏，Henry表示：「一直好欣賞Gigi喺演藝事業上努力同不斷求變，多謝佢今次邀請我同台演出，第一次當然緊張又興奮，希望Gigi同觀眾喜歡我嘅表演啦！」
當晚得到杯嘅幸運兒。
除咗演出外，Henry仲有一個秘密任務，就係喺Gigi唱《茶杯》時，將寫咗唔同歌詞嘅紙飛機飛到觀眾席，而每晚Gigi都會隨機讀出一段心水歌詞，如果觀眾幸運地拎到相同歌詞嘅紙飛機，就會獲得由佢親自製作嘅陶瓷茶杯，每晚只送出一隻。

Gigi喺獻唱《因果》時一度哽咽，佢分享當年被呢首歌嘅歌詞感動到不能平復，喺錄音室喊咗兩個小時，佢指當時覺得自己太傻，但估唔到咁多年後仍被呢份歌詞感動流淚：「嗰陣時就話啫⋯唉⋯而家都仲係一個傻婆，哈哈。唔好意思，等我平復一下先，有啲事情的確需要時間去平復。」
Gigi嘅老公同囡囡都有嚟捧場。
Gigi表示為香港歌迷編排專屬嘅side track愛情三步曲《好不好》、《因果》、《等人》，表示希望為大家帶嚟專屬嘅回憶。Gigi又指每場演出都會有佢編制嘅獨有歌單，令每晚演出都更加專屬，畀觀眾截然不同嘅感覺。