獨家丨周吉佩開騷挑戰敲擊油桶及跳舞 相隔18年再次推出個人專輯

周吉佩(吉吉)近日集中火力為首個個人演唱會綵排，為咗帶畀吉S粉驚喜，吉吉除咗會自彈自唱外，仲會首次挑戰敲擊油桶，呈現一個Rock友狀態，希望送一份誠意同新鮮感畀大家，見佢綵排當日已經玩得似模似樣，不過始終係Solo環節，令吉吉都有啲壓力，擔心做出嚟效果唔夠Energy。
周吉佩為首個演唱會落力綵排。
除咗呢項突破，吉吉仲要克服最大嘅跳舞難關，佢話原本係冇呢個環節，但朋友同粉絲嘅反映，指開騷冇可能唔跳舞，跪求佢加插一幕歌舞表演，所以吉吉正努力排舞，更預告會有位少女一同演出，而佢嘅一對仔女都會上台，實行將演唱會湊合老中青表演。
吉吉話要克服最大嘅跳舞難關。
除咗演唱會令粉絲引頸以待之外，大家仲好期待吉吉嘅新專輯，呢日吉吉就有個好消息公布，相隔18年終於再次推出個人大碟，所以唔單止係一眾吉S粉期待，連吉吉自己都好心急呀。