Twins巡唱北美最後一站遇6級地震 阿Sa被嚇醒跳上床縮埋一角

蔡卓妍（阿Sa）同鍾欣潼（阿嬌）早前展開北美巡演，去到最後一站Reno，此次行程遇上當地6級地震，慶幸地震時間短便停咗，大家安然無羔。完成Reno演出之後，Twins先返香港工作，再飛倫敦演出。

蔡卓妍同鍾欣潼早前展開北美巡演，去到最後一站Reno。
當時阿Sa仲喺睡夢當中，突然聽到房門啪啪聲，最初以為有人拍門，然後發覺窗門搖緊，阿Sa本來喺浴缸放咗一缸水，等空氣唔好咁乾，佢見成缸水都搖到有波浪，頓時覺得好驚，未試過感受到咁強地震；阿Sa即刻跳上床縮咗喺一個頭頂冇任何嘢嘅角落，一來唔知震幾耐，二來又擔心間房天花板嗰個大燈跌落嚟。

17年前舊照！
阿Sa喺IG上放咗佢同阿嬌17年前影嘅相，歌迷紛紛留言稱二人冇變過咁。

阿Sa事後有問其他工作crew，喺房間嘅人都感覺到地震，阿Sa仲話：「唔怪得到埗之後，有一個工作人員喺酒店用指南針度方位，幾次都度唔到，其他人仲講笑問係咪有鬼」，而阿嬌就完全感覺唔到地震：「我瞓緊覺，真係乜都感覺唔到。哈哈。」明晚（美國時間週六） Twins將喺Reno演出，之後返港工作，12月20號再於英國倫敦OVO Arena Wembley演出。

蔡卓妍同鍾欣潼遇上當地6級地震，慶幸地震時間短便停咗，大家安然無羔。
是次北美巡演，到尼瓜拉瓜大瀑布時，兩人一齊喺瀑布合照，阿Sa喺IG上放咗佢同阿嬌17年前影嘅相，歌迷紛紛留言稱二人冇變過咁，同17年前一模一樣。阿Sa笑言今次北美巡演已破晒戒、食甜嘢、炸嘢同澱粉質全部食齊，等返港先戒口同做運動，嚟緊佢仲要幫電影做宣傳，到12月尾去英國演出完先有假放。

阿Sa笑言今次北美巡演已破晒戒、食甜嘢、炸嘢同澱粉質全部食齊。
至於阿嬌返港後就要去北京工作，對於歌迷大讚佢keep得好，十幾年都咁靚，阿嬌表示好耐冇試過同阿SA一齊巡演咁耐，今次行程冇咁密，大家有一齊去行街影相玩吓，細個成日一齊出埠工作嗰種感覺返嚟，好珍惜今次旅程。

阿嬌表示好耐冇試過同阿SA一齊巡演咁耐，今次行程冇咁密，大家有一齊去行街影相玩吓。