衛蘭《聲生不息》與李治廷舞台重聚 宣布明年將再開個人演唱會

新一季《聲生不息》已經開始播出，首次參與內地綜藝節目演出嘅 衛蘭 ，亦以優秀歌喉成為今季亮點之一。上星期參與歌手以「香港電影OST」為主題首次競演，嘉賓分成兩隊分別由陳小春、容祖兒 擔任男、女子組隊長，兩隊各自挑選3首歌曲，再由隊員對戰。

衛蘭加入新一季《聲生不息》演出
Janice代表女子組登場，獻唱電影《天若有情》嘅片尾曲《灰色軌跡》，仲邀請曾經係同門師弟嘅 李治廷 擔任「飛行嘉賓」合唱。
仲同曾係同門嘅李治廷合作演出《灰色軌跡》

2009年仲係新人嘅Aarif李治𨑳，當時已一手包辦Janice整張英文專輯歌詞，後來佢哋合演電影《為你鍾情》時，又同時合唱片尾曲《為你鍾情》。2013年Janice同Aarif喺馬來西亞雲頂合作舉行過演唱會。之後兩人事業各有發展，今次再喺舞台重聚已事隔10年，綵排當日一見面就即時擁抱，互相問候之餘話題更連綿不絕，Aarif更笑指自己係為女子組助攻。
原來佢哋已經近10年冇同台演出

而Janice指選擇Beyond名曲《灰色軌跡》嘅原因︰「我好想試一啲新嘢， 俾我哋揀嘅3首歌都好好聽，但我比較少唱band sound，尤其Beyond嘅歌曲，真係好經典。」
Aarif笑指自己係為女子組助攻嘅武器

錄影時Janice同Aarif默契十足，一開口已感動觀眾，連張智霖、林曉峰、梁漢文等都跟住唱，加上播放《天若有情》嘅片段更帶動現場氣氛。事後Janice話︰「估唔到上一次見李治廷已經係A Music年代，差唔多11年冇見面，再見返真係好開心，仲要喺《聲生不息》舞台合作，雖然咁耐冇見，但見返嘅感覺一啲都唔陌生，好似從來都冇離開過大家，又返回以前一齊做騷嘅感覺」
當年Aarif同Janice曾合作《為你鍾情》演出

Janice喺上星期播出嘅第2集似乎已適應綜藝節目拍攝，不過面對同場一眾「綜藝王」，佢就始終比較慢熱，不過佢嘅笑容同笑聲就被網民指係節目組中嘅開心果，Janice話︰「開始慢慢適應，亦開始同其他歌手熟，冇之前咁緊張，我覺得做自己最舒服，亦因為參與呢個節目，我嘅普通話進步得好快。」
Janice指自己已逐漸習慣綜藝節目嘅拍攝

另外，Janice在日前參與廣州一個音樂節演出，仲喺台上分享明年將再次展開個人演唱會，事後仲即刻吸引唔少歌迷追問細節詳情，不過就要等官方再作公布喇。

《聲生不息·大灣區季》逢星期六晚 20:00 翡翠台