富貴千團｜與黃庭鋒年廿九鬧市派禮物 姚宏遠獲拍檔讚股肌結實

新劇《富貴千團》喺過年期間播出，為大家帶嚟唔少歡樂，趁住年廿九市民衝刺辦年貨嘅時候，兩位男主角黃庭鋒同姚宏遠就親自去到鬧市派揮春同朱古力，為新劇宣傳。不論係靚女定型男、老友記定小朋友都係佢哋目標，務求令大家感受到劇集嘅歡樂氣氛。

黃庭鋒同姚宏遠年廿九照出動到街頭宣傳
向途人大派禮物，對於姚宏遠嚟講有一定挑戰，佢直認唔係咁容易，而經驗豐富嘅庭鋒就好快同市民打成一片，仲有途人話噚晚喺劇集中見到庭鋒好矮，真人就長高大咗。
劇中佢哋為賺錢出盡法寶

講到劇集首播時，佢哋一班人就去咗馬國明夫婦屋企一齊欣賞，一齊打邊爐，庭鋒話經已約咗一段時間，因為套劇已經拍咗三年幾，到今日終於播出便一齊慶祝。

兩人又有騷肌畫面
庭鋒呢個鏡頭到底望咩？

劇中兩人有唔少騷肌場面，事前都需要加操，身為健身教練嘅姚宏遠正好可以發揮專長，而兩人拍攝嘅第一日，就要喺健身室嘅更衣室剝室，姚宏遠仲要係全裸，當時佢都心諗尺度咁大，出唔出度街。庭鋒話姚宏遠唔只上身肌肉勁，連下身都利害，股肌非常結實，而拍攝期間，兩人都差不多日日健身室見面操弗。

《富貴千團》星期一至五晚 20:30 翡翠台