木村拓哉一蘭拉麵初體驗 粉絲大讚食拉麵都靚仔過人

日本男星木村拓哉近年活躍於網上平台，近日佢YouTube頻道嘅一條新影片就引起熱烈迴響，事關佢第一次品嚐知名連鎖拉麵店「一蘭」，大明星食平民美食，果然不同凡響。
木村拓哉早前喺自己嘅YouTube頻道去品嚐一蘭。
食拉麵前，木村先造訪位於福岡縣嘅一蘭拉麵工廠。

影片開始木村先造訪位於福岡縣嘅一蘭拉麵工廠，細心聽專人介紹品牌歷史，之後到附近嘅分店實際品嚐拉麵。第一次食一蘭嘅木村，湯頭同麵條部分都選擇標準款，之後再選擇半份蒜頭、蔥、叉燒同半熟蛋，過程中木村不斷發出讚嘆聲，仲意猶未盡追加咗半份麵，兼飲晒所有湯，明顯好啱口味。食飽飽嘅木村似乎仲覺得未夠喉，最後買左三大袋拉麵先心滿意足離開。
木村第一次食一蘭。湯都清埋。
影片上架後，粉絲迴響熱烈，大讚男神「連食拉麵都靚仔過人」，又讚佢提升咗一蘭嘅美味程度，仲有細心嘅觀眾留意到細節，例如木村入到舖頭除褸之後，特登將外套內側外翻，因為外側可能有髒污會影響店內用餐環境。另外木村食麵過程湯汁完全冇濺出，唔知靚仔有禮，連用餐禮儀100分。
木村食完仲買「手信」。