黑妹炮製驚喜生日派對 肥媽即場作歌答謝大家

啱啱過去嘅18號係肥媽Maria Cordero嘅71歲，好友黑妹李麗霞早前就為佢搞咗個以中國風為主題嘅驚喜生日派對，當日仲邀請咗 胡楓、羅蘭、車婉婉、周國豐、陳友、韋綺姍、張佳添、大佬B吳志雄同太太、連炎輝等好友到場。
羅蘭都有到場同肥媽慶祝。
當日黑妹扮成好似平日約肥媽飲茶咁約對方出嚟，起初肥媽都不以為意，但當佢哋去到現場、肥媽見到有拍攝隊時就即刻起疑，黑妹即話只係約咗佢同自己個女總共3個人，但當肥媽走入預先準備好嘅場地後，樂隊時刻起音樂唱生日歌，令肥媽驚喜不已。
大佬B都有同肥媽一齊合唱。當日有唔少賓客都開金口獻唱。
現場咁多位唱得之人，當然少不免要唱返幾首歌啦，黑妹、胡楓、羅蘭、車婉婉、周國豐、陳友、韋綺姍、張佳添同大佬B都有輪流獻唱，唱到慶起時肥媽更即場創作首歌嚟多謝大家：「有了你 我什麼都不重要 有了你們的愛 修哥我愛上了你 我媾咗佢幾十年 他 無動於衷 我等你等得好苦 你知道不知道 我愛你愛你愛你們 從我的心裡」。而呢首即興作品亦畀修哥錄低咗。放到佢嘅社交平台。
修哥都有獻唱。肥媽仲即興作咗首歌。
事後肥媽將當日嘅影片剪輯好放上社交平台，並喺帖文中寫道：「開心驚喜生日派對，仲有埋中國主題佈置👏好驚喜🤩🤩多謝黑妹和台前幕後的安排😚😚。」肥媽感謝大家用心為佢製造嘅生日驚喜，同時亦多謝大家送上嘅祝福：「我真係好幸運同埋覺得好幸福，因為總係有好多錫我嘅人在身邊❤️多謝晒😘😘😘😘😘衷心祝大家都身體健康，最希望世界和平，人人都開心幸福美滿❣️」。
肥媽感謝大家咁錫佢呀。