羅啟豪戴校呔重回母校華仁書院演唱 回憶執波歲月大爆「成績唔好」因由

前日（23號）係港島區名校華仁書院105週年開放日，歌手羅啟豪（Ramon）以舊生身份重回母校，獲邀為Talent Show（才藝表演）作壓軸表演嘉賓，呢次活動同時係啟豪Busking Tour嘅第九站灣仔區，而師弟余德丞擔任活動司儀，啟豪獻唱個人單曲《相信 相信》及同校師兄李克勤之代表作《紅日》，炒熱全場氣氛，更大爆求學時期趣事。

羅啟豪獲母校邀請為開放日作壓軸表現嘉賓。
啟豪留意校園有許多重新配置之處， 回憶起執波嘅歲月，佢笑言以前籃球場係冇圍欄：「我間課室又喺正籃球場隔籬，所以成日有籃球碌入嚟，我哋日日都要執起掉返出去。可能就係因為咁，最後就加咗而家見到嘅圍欄喇！」啟豪更幽默稱自己嗰班成績差過其他班係要體諒吓。

啟豪戴29年歷史校呔千山萬水重返母校。
啟豪自嘲雖然整體成績唔算突出，但佢曾喺地理科考第一名，藉此機會向曾教導自己嘅老師致敬，緬懷剛離世嘅恩師李sir，啟豪話呢位老師會一直長留喺佢心中，亦感謝母校一直幫助學生發揮潛能：「好多出自華仁嘅師兄弟都能好好發揮自己，包括大家熟悉嘅李克勤師兄！」隨後啟豪唱出《紅日》，全場觀眾投入大合唱，將氣氛推至高峰。

羅啟豪於余德丞兩師兄弟合照.。
當日啟豪化身懷舊Boy，特意佩戴中一開學時購買嘅校呔：「呢條校呔成29年前買，由香港跟我去英國完成中學，然後又去美國住咗幾個城市，之後再返英國，直至因唱歌比賽回流返香港，真正陪我走遍千山萬水。」可見啟豪對母校確有深厚感情。

啟豪被師兄弟要求合照來者不拒。
演出結束後，眾多師兄弟及其家屬紛紛與啟豪合照，校方亦特意為啟豪歌迷會預留門票，讓歌迷（暱稱為豪殼）參觀校舍及欣賞演出，而歌迷會為啟豪策劃嘅18區 Busking Tour，轉眼已經完成一半。啟豪就覺得第9站係整個項目重要里程碑，更慶幸此站能喺自己母校舉行。

豪殼獲邀觀賞為場面更添熱鬧。

啟豪難得重返母校到處留倩影。Ramon感恩學校培養學生發揮才能。啟豪原來喺小時候日日要做「執波仔」。啟豪返回校園即時表露調皮一面。