潘靜文26歲生日獲特別方式祝賀 林智樂神秘放黑圖為老友慶祝

「聲夢歌手」潘靜文（Sherman）又大一歲喇！2月25號就係Sherman嘅26歲生日，一眾歌迷紛紛為佢送上生日祝福，又分享多張Sherman捧蛋糕許願嘅靚靚相。林智樂（Felix）同Sherman老友鬼鬼，呢次就反其道而行，啲Fans share靚照，佢就分享Sherman嘅「黑圖」。

2月25號就係Sherman嘅26歲生日，一眾歌迷紛紛為佢送上生日祝福。
Felix喺社交平台限時動態出Post，先係祝壽星女生日快樂，然後就話：「本身想鋪（Post）返上個月記錯生日嗰個Story，但係原來delete咗嘅Story係搵唔番。所以今年送上一張靚啲嘅合照。但係為咗懲罰自己，我決定收埋三張你嘅黑圖系（喺）呢張相入邊，歡迎大家cap圖放大黎搵。」

林智樂同Sherman老友鬼鬼，就分享Sherman嘅「黑圖」。
雖然Felix就話自己放咗3張相，不過點睇都係得一張Sherman疑似素顏嘅獨照，作為當事人嘅Sherman就回覆：「感恩，我淨係搵到兩張。」

Sherman亦有分享好友合照。
不過無論點都好，朋友之間就係「愛到深處自然黑」，正因為夠老友，所以Felix先會用黑圖為好友慶祝生日，唔知大家又夠唔夠眼力搵齊三張黑圖呢？