姚焯菲榮登優異生獲母校貼堂 升學去向再受粉絲關注

「聲夢歌手」姚焯菲（Chantel）唔只唱得又演得，就連讀書都特別好。雖然Chantel已經喺新西蘭完成中學階段學業，返到香港繼續投入演藝工作，但喺兩年留學期間佢都周不時分身為事業打拼。不過Chantel就將工作同學業兼顧得好好，更成為學校嘅優異生添！
 Chantel早前完成新西蘭中學課程，原來更成為年度優異生

近日有網民出Post貼相貼文，佢就話收到同Chantel同校嘅妹妹send相，Chantel同其他幾位同學仔一齊被學校以上屆IB文憑試Top Scholars（頂尖學生）名義貼堂，網民大讚Chantel「又叻又努力，個個team break都飛返香港工作唱歌，但成績都咁好，認真厲害。」亦有粉絲同Chantel講：「可以獎勵一下自己。」
雖然留學期間不時都返港兼顧事業，不過仍有好成績須真係唔簡單

根據澳紐IB學校組織資料顯示，喺IB取得Top Scholars榮譽嘅學生，至少要在45分中取得40分，絕對唔容易！而今屆參加IB文憑試嘅新西蘭學校學生中，只有84人取得Top Scholars榮譽。
去年底返港嘅Chantel，升學之路亦再成為Fans關注焦點

而Chantel就用三個感動emoji轉發Post，一班粉絲都紛紛留言祝賀：「點解可以咁叻女，舊年仲不斷錄歌出歌宣傳，又兼顧得學業咁好。仲要個人咁謙虛」、「真係好叻女，辛苦時期捱過了，將會愈來愈好，支持你」、「品學兼優，勁呀」。雖然Chantel曾自爆希望到美國升讀大學，但亦表示如果香港三大派Offer，自己都會考慮留港升學。但Chantel一日未扑錘決定升學路向，仍然都有唔少粉絲想知Chantel嘅計劃有冇變，所以呢次都係留言區提問關心啊！