林鈺洧剖白成長經過 13歲起獨居學識堅強

應屆香港小姐冠軍 林鈺洧 父母早年離異近日又因為當年感情同撫養問題而隔空罵戰，Denice近日接受香港電台節目《舊日的足跡》訪問，憶述同媽媽度過嘅童年生活，以及同爸爸 林俊賢 首次見面嘅經過。

Denice坦言自己人生大部份時間都過得十分困難，每到順境時又會感到慌張。正因為參選前一年生活和收入都穩定，所以就想藉選美挑戰自己。但係當選港姐冠軍後新聞浪接浪，就令佢感到非常大壓力同時亦唔開心，佢話「嗰啲指控同說話好難聽，又有網民會相信，唯有靠瞓覺同食嘢去調節自己心情，不過但我相信時間會令誤會嘅人明白。有人話我嘅屋企好細，其實嗰度係我人生之中最大嘅一間屋，一個人住兩房一廳已經係奢侈，我嘅冠軍后冠都放喺屋企。我好感恩，唔會搬。」

佢又提到，港姐前輩李嘉欣同向海嵐係自己最喜歡嘅兩位港姐。佢欣賞李嘉欣踲美貌，而向海嵐喺劇集《無頭東宮》演出奸妃一角亦令自己著迷，加上曾擔任慧妍雅集主席多年，所以係自己嘅學習對象。Denice仲希望自己都有機會為慧妍雅集效力，又指會努力設立自己嘅慈善基金幫助單親、住劏房或受虐兒童。

近日唔少報道提及Denice嘅家庭同成長，好似佢13歲就被媽媽安排離家自住，Denice話「呢個係我哋雙方嘅意願。媽媽好後生就帶住我，好辛苦，當時我都明白。有一日我放學返屋企，佢就話大家分開住，我一聲『好』就搬咗去一個劏房。雖然地方細、隔音差，但我好開心，我自己學識煮飯同洗衫。其實當年生活比較艱難，媽媽間中情緒欠佳，分開住都係一個解決方
法。」

到中學時期，Denice坦言為多賺生活費，放學會化身補習老師或者侍應生，「其實好多
事媽媽都唔知道。佢安排我13歲自住，就係想我獨立，有一段時期我曾經壞過，因為高年級R姐姐帶我去玩，好彩自己身體唔鍾意喜歡酒精或者嗰啲奇怪嘢，所以就逐漸遠離佢哋。點保護自己？就係要撞板直到自己學識為止。我當然唔建議家長用我媽媽對我嘅方法，絕對唔可以。將來如果我生咗女，佢未到30歲，我都唔會俾佢出去住。」

至於同生父林俊賢嘅初次見面經過，Denice話：「我15歲時，爸爸嘅女友透過社交平台搵到我。當時我唔知道爸爸叫林俊賢，佢嘅好朋友用車載我去口岸接佢，因為佢住喺大陸。佢
好大聲、好有中氣。上車講一句『喂，Hello』，成部車都震。當時我覺得佢比我緊張。相認之後，我冇話俾媽媽聽，因為我怕佢會話：『有冇攪錯，我將你養大，你竟然走去搵個衰人？』
「同佢相認後生活冇特別變化，因為佢唔喺香港住，一年只係見一、兩次。我習慣一個人，知道自己係星二代都好，因為認識我嘅人多咗，工作機會都會多啲。」

Denice直言自小愛逞強，認為自己可以做到好多事，做唔到都要死頂去做：「每當我遇到解決唔到嘅問題，就會鼓勵自己，同自己講：『最多咪瞓街，又唔係未瞓過！』同媽媽同住嘅時候，我試過同佢嗌交去公園瞓，醒咗就去返學，好小事。媽媽唔會搵我，呢個係我哋嘅溝通方法。我冇迷惘，我想鼓勵大家，只要心存善念，好事就會發生。」