做節必食18道菜｜星廚帶隊嘉賓學做名菜 HEA三人組互寸翠如繼續地獄

一連6集全新節目《做節必食18道菜》今晚起播出，除咗有三位星廚 黃亞保 蕭秀香 同 祈積奇坐陣之外，仲有大批嘉賓藝人參與，好似 黃翠如、蕭正楠、蔣家旻、譚俊彥、 陳自瑤、劉穎鏇、何依婷、陳敏之、黎諾懿、江嘉敏、戴祖儀、區永權、伍仲衡、何廣沛、 郭子豪同余思霆等。

三位星廚將兵分三路，帶領唔同組別嘅嘉賓藝人，拜會唔同主題嘅地方菜館，搜尋必食18道菜，仲會走入廚房重地向餐館主廚「偷師」。 今個星期三姐、保哥同祈積奇，就會帶領陳敏之+黎諾懿、蕭正楠＋區永權+伍仲衡 仲有 黃翠如+陳自瑤，品嚐潮州、順德、客家，仲有福建三大地方嘅新春名菜。

其中潮洲必食新春菜就有「金銀蝴蝶大鷹鯧」、「黃皮炆隆江豬手」、包含18種食材嘅「潮州圍爐」。而順德同 客家必食新春名菜為「獨佔鰲頭」(煎焗魚嘴)、「客家碌鵝」、「豬網油釀金蠔」。福建必食新春名菜就有「佛跳牆」、「福建五香卷」同埋「至豪海蠣六福宴」。

由於三組藝人都老友鬼鬼，所以氣氛相當熱鬧喜慶，而三個組合當中，以第二集嘅蕭正楠、區永權同伍仲衡最為百厭。當佢哋品嚐煎魚嘴時，伍仲衡就被區永權老點，仲講錯話：「人嘴我日日都錫架啦。」仲被區永權同蕭公子踩台： 「新春佳節，冇人有興趣聽呢啲嘢！」

之後Harry就還擊指Edwin欠才華兼要減肥，Edwin亦寸Harry食嘢唔做嘢。之後仲邀請保哥欣賞佢哋即將舉行嘅演唱會，保哥仲爽快答應，仲會上台表演打鼓咁話。呢集另一亮點係蕭公子即席跟大師傅學煎魚嘴，見佢有板有眼，賣相亦金黃可口，令平時慣性踩台嘅「臭口二人組」Albert同Harry都忍唔住大讚好味。 

至於在第三集亮相嘅蕭太黃翠如，佢嘅「地獄廚神」寶座繼續穩如泰山，當同好友Yoyo學做福建五香卷時，翠如竟將圓柱體包成「正方大餅」，外觀相當趕客； 搞笑嘅佢仲將失敗作品硬塞Yoyo口中，嚇到 Yoyo大嗌佢變態。

而Yoyo品嚐人生第一道佛跳牆時， 唔止盛裝打扮現身，試煮期間仲不停將美味材料放落自己嘅專屬燉盅。事後勁搞笑解釋話：「因為我好慳，佛跳牆好貴我唔捨得食呀！」起筷前仲話自己「口水已流到落心口」，饞相盡出非常可愛。

《做節必食18道菜》星期一至三晚 22:30 翡翠台