肥媽李鼎｜肥媽一屋細路茄汁豉油撈飯 鼎爺靠滷水雞翼過低潮

《肥媽李鼎》今晚第五集主題係「懷念的味道」，肥媽指自己最深刻嘅菜式係「冬菜蒸牛肉」，又透露媽媽會喺牛肉加入麥皮，除咗令口感更細滑，同時仲會令「肉量」大增，肥媽笑指一直被媽媽欺騙：「我阿媽問我點解唔買牛肉蒸肉餅，我話好貴喎，有一日我唔打斧頭儲錢買啦，蒸完出嚟成家人喺度鬧，細佬妹係咁話好嚡，我問阿媽點解會咁，佢係咁喺度笑，然後先講畀我聽(真相)呀。」

肥媽又回憶最窮困時嗁情況：「得36蚊喺銀行，但要養6個仔女，每日都𢱑晒頭諗點樣賺錢，試過有一日揸住支茄汁同豉油，個仔望住我搖頭，我就點頭，佢話冇餸呀？我話係呀，咁咪茄汁同豉油撈飯囉！」

而鼎爺就指自己最潦倒時靠滷水雞翼維生，佢話：「廿蚊雞翼食一個禮拜，雞全翼一餐食兩隻，有味咪得囉，最緊要係碗飯之嘛！」而游游嘅童年味道則係撈冷麵，仲即場炮製俾肥媽同鼎爺品嚐，不過鼎爺就唔太欣賞喇：「講句得罪啲，係冇層次㗎。」

至於3號晚播出嘅第6集，主題則係「高低的人生」，肥媽指當年自己靠托麵粉養起成頭家，一個女人一次托起三包重50磅嘅麵粉，非常厲害，肥媽話：「當年係有自己同自己鬥，同自己講一定要托起佢，托唔起就冇飯食！」又指當年靠托麵粉賺到2千多元一個月。至於鼎爺年幼時就靠批馬蹄同剝核桃幫補家計，朝9剝到晚6，同樣辛苦。

講到買樓話題，23歲嘅游游就話希望5年內上車：「我覺得可以置業係人生高峰。」 肥媽透露首次置業經歷：「我記得我哋上樓時，細仔係摸住塊牆係咁啜， 全家人第一次買樓，係開心到形容唔到！」

肥媽人生首次置業時30歲：: 「有咗6個仔女之後先買，記得用咗28萬買，我好豪㗎，一次過買兩層，412呎一層，上到樓落雨唔會漏水，直頭係夢想嚟！」而鼎爺早於1971年已首次置業，佢話：「當時去咗台灣工作，6千蚊(人工)一個月，70年代6千蚊好緊要㗎喇。」鼎爺指當時打長途電話叫媽媽睇樓，目標係畢架山或美孚一帶，惟李媽媽最後作出嘅決定，就令鼎爺崩潰兼大反白眼，想知點解就要留意聽晚 《肥媽李鼎》喇。

《肥媽李鼎》星期一至三晚 22:30 翡翠台