林作被捕｜昨晚高呼：梅開二度！ 藝人速割蓆莊思敏損手

上星期先「轉戰」加密貨幣，大張旗鼓以貴租開鋪投入炒幣行列嘅前大律師 林作 ，據指今早因為虛擬資產交易平台「JPEX」嘅相關案件被捕，警方亦派員到其位於中環嘅新開設辦公室搜查。

下午約1點，林作由中環辦公室被押上警車帶走，據指現場檢走一批證物同大疊現鈔。

早前先入院冇耐嘅林作，新事業未起步就被捕，睇嚟真係頭頭碰著黑

證監會日前發警告，指有虛擬資產交易平台，透過社交媒體網紅同場外虛擬資產貨幣兌換商積極向香港公眾推廣平台嘅服務同產品，聲明呢個平台未有申領喺香港經營虛擬資產交易平台嘅牌照。亦要求曾參與推廣嘅相關人士停止推廣JPEX和其有關的服務及產品。

警告一出，正準備大展拳腳嘅林作即時喺社交平台發出聲明，指會暫停營運、停止推廣相關業務，亦主動聯絡同警方聯絡，向商業罪案調查科提供資料。

林作日前喺證監會發出警告後即時宣佈暫停推廣涉事交易所

圈中人一直都會參與唔同推廣與代言性質活動，今次涉事機構就先後邀請 張智霖 台灣大熱偶像 陳零九 等宣傳。而剛由外地返港嘅Chilam，經理人公司回覆傳媒時就指出，早已書面通知對方公司，未在港取得牌照前不能使用Chilam肖像宣傳，亦會保留追究權利。

Chilam年多前拍攝嘅推廣圖片，仍出現於涉事交易平台嗁社交網

而陳零九早前亦喺台北呢間交易平台所處嘅同一大廈開設工作室，仲邀請陳定邦堪察風水佈局。佢嘅經理人公司亦發聲明，指7月雙方合作關係已經完結，更指陳零九如需要會配合一切調查。

台灣藝人陳零九指有需要時會配合相關調查

同樣曾拍片宣傳平台嘅 莊思敏 ，日前出席公開場合時就指自己亦有損失6位數，不過暫時未有報案，早前購入的士牌之後隨即跌價嘅佢，更拒認自己係「投資明燈」。

莊思敏自稱損失約50萬，不過未有報案
(網上圖片)