丁子朗返內地錄《超星團》 詳述慘被遺棄公路口驚魂

丁子朗 同 馮盈盈 黃庭鋒 主演嘅熱播劇《妳不是她》大結局，丁丁又回歸超星練習生嘅身份喇。呢日佢同庭鋒作客電台做訪問時，亦講起參加《亞洲超星團》嘅體驗，雖然人氣排名宿時落後其他幾位香港代表，不過從啱啱播出嘅二次舞台，可以見到丁丁不斷進步，佢亦都好著緊排名，希望晉身總決賽，不過對成團就未有太大期望喇。

丁丁又透露節目會不斷錄影，好似早前佢就返內地繼續拍攝，但係喺穿州過省工作時仲遇上「被遺棄公路驚魂」。當時身處蘇州嘅丁丁遇上大霧嘅惡劣天氣高速公路封閉，丁丁突然被出租車司機遺棄喺高速公路口，呢日講返都似乎仲未驚完：「我嗰度一望無際，巴士又冇，的士又冇，好震驚嘅時候我打俾我嘅香港嘅經理人(求救)。」好好彩經理人獻計幫佢諗到去最近嘅高鐵站，幾經多次轉高鐵，最終丁丁用咗十幾個鐘由蘇州經南京再去合肥…千辛萬苦最後都抵達武漢，難怪佢都話的確係一次有驚無險嘅經歷喇。