肥媽李鼎打大佬｜游游計劃40歲退休 肥媽爆藝人利是秘聞

由 肥媽 李家鼎 同 游嘉欣 主持嘅《肥媽李鼎打大佬》嚟緊就會播出最後3集，主題分別係「退而不憂全攻略」同埋「一團和氣闖年關」。講到理想退休年齡，肥媽、鼎爺同游游又出現好大分歧，游游講笑話想40歲左右退休，嚇到肥媽眼都凸埋：「咁咪即係唔使做？你諗住吊金龜算喇？」

目標40歲退休嘅游嘉欣又被肥媽狂笑
之後肥媽追問游游覺得一個月幾多「使費」先夠? 游游講出一個數字後，肥媽非常愕然仲大讚游游「娶得過」！之後肥媽再追問游游：「你認為幾多錢先夠退休？」游游天真咁話：「假使我40歲開始唔做嘢，而自己又活到80歲，咁我仲有40年人，我估要400萬？」兩老聽完大呼「冇可能」﹗ 豈料游游反而愕然表示：「400萬都唔夠？」當見識到游游「數口」有幾差之後，肥媽即一句KO游游: 「食爺飯，著乸衣」(意指靠屋企人)，游游聽完一臉慚愧謂：「都係嘅，同屋企人一齊住使費比較低！」

因為無咩錢銀觀念，搞到喺節目中連番被追擊嘅游游，本著「好學」精神向兩老請教儲錢大計，肥媽鼎爺即大方分享老一輩的「慳錢經」，肥媽話以前阿媽教佢哋，一出糧就要買金戒指，幾薄都好。咁到年尾就有12隻，夾埋就可以換隻大戒指，而鼎爺就認為最緊要識忍手：「例如我鍾意嗰樣嘢，我依家唔夠錢，我就下決心捱多兩組(戲)，儲多啲(錢)就買到喇。」肥媽聽完即大爆自己當年辛苦儲錢買完一樣「恨咗好耐」嘅心頭好後，反而跌入困局嘅趣事。

最後三集節目鼎爺同肥媽會繼續爆料

肥媽同鼎爺又追加分享「襟撈大法」，肥媽話：「要抵得諗咯！人哋叫你做嘢唔好問幾點收工，要做多過自己嘅本份。」鼎爺就以胡楓修哥做例子，叫大家無論咩年紀，工作最緊要識Enjoy，並揚言做得演員，有一件事絕對唔好介意咁話。

游游亦一貫以獨特嘅邏輯被兩位前輩狂潑冷水

節目中，肥媽同鼎爺除咗大講農曆新年傳統同習俗，肥媽仲自爆花生指數極高嘅新年開騷逗利是秘技，並分享「賭城利是戰衣」必勝法係V領設計同兩個胸圍，肥媽仲話最豐收一次，係一場穩袋高達六位數「利是」。

鍾意食花生嘅三人，又大爆「藝人利是秘聞」，肥媽爆出因為一個原因，好少人夠膽埋鄭裕玲身逗利是；至於游游就透露有傳聞指家燕姐嘅利是有神秘力量，想知係咩？咁就要密切留意最後三集《肥媽李鼎打大佬》喇。

《肥媽李鼎打大佬》最後三集 星期一至三晚 22:30 翡翠台