姚焯菲新歌破百萬點擊 享受成長過程不忘初心

姚焯菲(Chantel)雖然已經飛返新西蘭繼續升學，不過佢臨飛之前都錄製咗首新歌《初心小島》，等一眾小菲象們可以止止渴，新歌上架一個月就破百萬點擊。Chantel仲首次現身音樂節目《J Music》獻唱新歌，講起歌曲背後嘅意思令Chantel有唔少反思。

Chantel最初收到歌曲Demo時，感覺好似韓劇主題曲，不斷思考填咩詞先貼切現在自己嘅年紀同狀態，最後歌曲係描述初心嘅自己，仲話因為初心嘅自己先係最純粹，無憂無慮。不過講到鍾意初心嘅自己定係見識多咗成長後嘅自己多啲？Chantel就話：「呢個好問題，兩樣鍾意，但更鍾意眼界開咗嘅自己，接受成長過程。」

喺節目上Chantel會同潘靜文及《聲夢傳奇2》嘅劉芷君合唱《浪漫候群症》，三人合唱為觀眾帶嚟驚喜，就連Chantel覺得今次嘅組合好特別，期待三人合體感覺。另外，Chantel亦有同冼靖峰(Archie)合唱《隔離》。