/public/article/images/202404/07b618c3-efff-4a11-831b-bd929017d99b.jpg)
Gigi炎明熹 4月9號正式踏入19歲，不過因為正為星期五就舉行嘅一連三場《Gi-FORCE演唱會》綵排，所以生日都只能喺排練室度過，而一班音樂同舞蹈團隊非常愛錫Gigi，偷偷為佢準備生日蛋糕慶祝，但令佢更喜出望外嘅，係早前同4百多位Fans預祝生日，當日以動物派對為主題，大家悉心打扮之餘又安排連串節目為Gigi賀壽，而Gigi就以公主造型亮相，又同大家一齊玩遊戲，氣氛非常熱鬧。
正式踏入19歲嘅Gigi，連日來為演唱會密集排練，即使正日生日亦於綵排中度過。Gigi噚日下晝如常到Band房練歌，演唱會音樂總監 周錫漢 同音樂團隊，仲有新加入嘅成員Felix林智樂，送上生日蛋糕為Gigi慶祝，Randy祝Gigi快高長大、學業進步，而Felix就送上金算盤，預祝Gigi可以賺錢買到10層樓。
加入演唱會音樂團隊嘅Felix，向Gigi大手筆送上金算盤
生日正日依然要練歌嘅Gigi，獲團隊為佢慶祝
到夜晚，壽星女Gigi轉往排舞室練舞，舞蹈總監林文輝老師亦同一眾舞蹈員準備生日蛋糕，蛋糕仲寫上「炎師傅 生日快樂」，原來因為Gigi在演唱會打後空翻，練「舞」如同練「武」，因而被大家笑稱佢為「炎師傅」。團隊上下對Gigi痛愛有加，壽星女仲坦言冇估到一日之內收到兩個生日蛋糕，所以份外驚喜。
至於一眾舞蹈團隊亦向「炎師傅」拜壽
雖然生日喺工作中度過，不過Gigi就完全唔介意，最在意嘅反而係自己嘅演出狀態，佢話：「生日正日要Band Rehearsal，希望有一個好嘅狀態迎接演唱會，因為早排病過，聲帶未完全回復最好嘅狀態，希望靠吸引力法則，把聲可以好返，個狀態可以一直好到去演唱會之後。」
愛錫Gigi嘅一眾歌迷，上個星期六為Gigi舉行大型生日派對，提早同佢慶生之餘亦希望幫Gigi減壓兼打氣。派對喺私人場地舉行，4百多位Fans悉心打扮到場，扮貓扮狗、龜、蛇、兔、雞、蜜蜂等包羅萬有，令現場猶如動物園一樣。
400多位Fans上星期已為Gigi舉行大型派對預祝生日
呢日Gigi就以一身公主打扮亮相，再配合好朋友陳小姐嘅白馬王子造型，蹺住手一齊進場，Gigi話：「我本身第一個選擇唔係扮公主，但又冇頭緒扮乜，今次嘅主題係動物派對，好多粉絲都扮動物到場，而我前幾年拍節目有扮過公主，呢個公主本身個角色同動物好好感情，但今次條公主裙設計同上次有少少唔同，某程度都表達到我嘅改變，所以最後決定扮公主。」
Gigi為配合派對主題，仲拍攝一輯以動物為主題嘅靚相，除咗抱住貓貓合照，壽星女又同蜥蜴仲有杜比亞蟑螂一齊影相，現場播放嘅拍攝花絮中，大家見到Gigi手持杜比亞蟑螂把玩，仲展現開心笑容，都不禁嚇到嘩聲四起。
公主打扮嘅Gigi抽盲盒完全無畏無懼，非常大膽
Gigi嘅大膽仲延伸到現場，佢同Fans一齊估盲盒遊戲時，台下觀眾見到箱中有兩隻蜥蜴同青蛙，當Gigi毫不猶豫伸手入箱時，現場Fans都高聲尖叫，反而Gigi就非常淡定，當發現箱中都係假嘢時，仲擺出一副「沒好氣」嘅表情。
Gigi又指會繼續努力答謝大家支持
呢日大家又安排多個為Gigi賀壽嘅表演節目，仲有動物Cat Walk比賽，由Gigi選出最佳造型同最佳台風獎，而Gigi亦分享最有趣嘅環節：「盲盒係一個幾驚喜嘅環節，但講到最暖心，係見到大家一齊為我表演嘅一幕，今日天氣其實有啲熱同焗，見到佢哋為咗呢個生日會去扮動物、準備表演環節，非常暖心，平日係佢哋睇我表演，今日我喺台下睇返佢哋表演，感覺好神奇。」
睇佢笑容就知呢日玩得非常開心喇
Gigi最後又感謝大家為自己嘅安排：「再一次多謝大家，因為每一位都喺我每一個唔同階段認識我，希望大家可以見證住我嘅成長，我會盡力地唔會辜負大家對我嘅期望，希望大家可以繼續陪住我，為我加油，做我最堅實嘅後援。一人難順百人意，百人難順一人心，但我都會盡力去做，希望大家可以俾多啲意見我，好多謝你哋寫俾我嘅信，我會睇，之後收埋，希望將來有多幾個月餅罐俾我收埋呢啲信。」
