家族榮耀之繼承者｜預告釋出長孫女阿佘力戰全家 撈家加入與子溢父子爭話事權

由金牌監製 梁家樹 同 陳德修 聯合監製嘅《家族榮耀》，2022 年播出時大結局收視錄得(7天跨平台總收視)30.3點，全劇平均收視亦高達27點。

承接劇集好聲勢，劇組去年開拍續集《家族榮耀之繼承者》，亦即將強勢登陸翡翠台，TVB星期二晚公開首條宣傳預告片，令唔少觀眾都非常期待。 分別於馬來西亞同香港取景嘅新一季《家族榮耀之繼承者》，由《家族榮耀》原班幕後精英投入打造，繼續以豪門家族為題材，故事講述丘家長孫女丘皓兒( 佘詩曼 飾)雖然精明能幹，但礙於女兒身份，加上父親丘家長子守仁( 許紹雄 飾)看淡權力與名利，令皓兒於家族中一直未能站陣腳勢，公司大權完全落於丘老太爺( 劉江 飾)嘅二子守義( 羅嘉良 飾)同佢嘅仔智斌( 羅子溢 飾)手上。

大滿貫視后阿佘加入《家族榮耀之繼承者》，仲似乎會以一敵全家

不過因為丘老太爺忽然病重，更留下委託書著皓兒全權代理集團主席要務，令原本已關係緊張嘅丘家一夜變天，一幕幕峰迴路轉而緊張刺激嘅繼承者大戰如箭在弦。

大家長劉江屬意家族傳承予長孫女，可惜其他人並未認同

《家族榮耀之繼承者》宣布開拍續集至今，卡士一直成為關注焦點，根據新鮮熱辣公開嘅首條預告，17名主演陣容亦正式全面曝光， 佘詩曼、羅嘉良、許紹雄、余安安、林峯、黃浩然、張鳳妮、陳靜、梁靖琪、陳瀅、梁諾妍、王敏奕、劉江、吳岱融、龔慈恩、劉浩龍同羅子溢都有份參與，各懷鬼胎嘅神情同充滿仇恨嘅眼神，加上「豪門上流全員惡鬥」Slogan，可以期待新一季一定劇力萬鈞。

最新預告片見到多位演出陣容，養尊處優嘅張鳳妮亦有參演

眾多演員之中，除咗接連獲得《萬千星輝頒獎典禮》中連掃「最佳女主角」、「大灣 區最喜愛 TVB 女主角」同「馬來西亞最喜愛 TVB 女主角」成為大滿貫視后嘅佘詩曼最令人期待之外，上季大結局以彩蛋形式出場，搶盡焦點嘅羅嘉良亦係焦點所在，今季成為《家族》主角行列嘅「撈家」，繼續以一貫好演技吸引觀眾，一頭微曲白髮老妝配以老謀深算神情，亦演活角色應有嘅壓迫感。

上季結尾現身嘅撈家，將加入同兒子羅子溢一齊爭奪家族生意

預告片亦曝光劇集重要場面，除咗撈家同子溢兩父子密謀對付佘詩曼嘅盤算大計，亦包括余安安怒摑阿佘一幕，到底佢哋如何令視若仇家嘅「家人」恍如置身地獄？記得密切留意劇集播出嘅最新詳情。