有片｜貨Van司機被抄牌後怒罵警員網片瘋傳　網民出聲撐呢邊！

近日網上瘋傳一段貨Van司機怒罵警員影片。據發帖文者表示，周二早上（11月13日）9時許，一輛客貨車在新蒲崗大有街的雙黃線停泊，被在場警員發現後抄牌，司機懷疑心有不甘，故激動破口大罵警員。發帖者稱，「司機大佬情緒有小小激動，之後仲揸住車追住架警車，X足兩個街口。」

據長約15秒的影片所見，一名貨Van司機不斷怒罵警員，中間亦多次使用4字粗言穢語「問候」警員。

影片截圖影片截圖

網民出聲撐呢邊！

片段引起網民熱議，不少網民開聲撐警察，指雙黃線不准停車，直言是貨Van司機的錯，亦有人指貨Van司機情緒會影響揸車，對道路構成危險，「擺雙黃，抵抄」、「控制唔到自己情緒嘅人真係唔適合揸車」、「咁衝動，揸多兩轉補番數好過啦」、「你自己親黃線停車上落貨，已經輸咗」、「貨車佬都係欺善怕惡」、「要違泊就要有心理準備比人抄」、「追住警車鬧，已構成阻差辦公」、「點樣玩貨van都輸緊」、「睇住啲血壓，睇醫生仲貴」。

根據法例《定額罰款( 刑事訴訟) 規例》第240章，駕駛者不按交通指示行車觸犯法例可被抄牌，定額罰款額為450元。