感動味蕾丨周奕瑋大阪造訪當地隱世美食 王敏奕擔心狂食一個月走晒樣

周奕瑋（Jarvis）再度出發去大阪，拍攝全新飲食節目《感動味蕾》，呢次就同新拍檔王敏奕（Venus）一齊出發，雖然係初次合作，但係兩個人已好有默契，佢哋各自帶咗跑鞋，因為預咗嘆完美食之後要還，王敏奕話好擔心一個月之後走晒樣，出發前已盡力操弗，而首次參與非戲劇節目嘅王敏奕叫周奕瑋多多關照。

新飲食節目仲有一位居於日本大阪嘅美食家擔任主持，今次拍攝手法有別於以往旅遊節目，佢哋跟呢位美食家造訪當地隱世美食，王敏奕話有好多餐廳或小店連當地人都未必知道，王敏奕仲話除咗品嚐美食，亦會探討背後嘅感動故事。

日元滙率偏軟，唔少人去日本會血拼，啱啱榮升為大阪業主嘅周奕瑋就話會忍吓手，而王敏奕就睇吓有冇時間行街，因為工作通告排得好密。